“Gjaku nuk bëhet ujë, por edhe nëse bëhet nuk pihet”. Por në fakt paraja po tenton të kthejë gjakun në ujë duke përçarë kështu vëllanë nga motra, prindërit nga fëmijët apo burrin nga gruaja. Pasuritë e patundshme kryesisht, tokat që njerëzit i kanë trashëgimi nga të parët e tyre janë një nga shkaqet kryesore që çojnë në zënka madje dhe vrasje mes vëllazërisë.
Shumë prej këtyre familjeve as nuk e dinë si quhet stërgjyshi i tyre nga i cili kanë tokën, ndërsa varrin e tyre as e mendojnë ndonjëherë se ku bie, por kur vjen puna për pjesën e pasurisë, dinë mirë edhe pëllëmbën e fundit të tokës që u takon. Nuk janë vetëm zonat rurale që kanë probleme familjare për ndarjen e pronës, por përçarje të tilla kanë pasur edhe burrat shtetit.
Por në fakt paraja jo vetëm që ka përçarë shumë familje duke shkaktuar dhe gjakderdhje në radhët e tyre, por shumë burra i ka ç’burrëruar. “Kur njeriut i shtohet salltaneti, i largohet burrëria” thotë një fjalë e urtë popullore, e cila duket se u shkon për shtat burrave të sotëm, të cilët për para të bëjnë “shok të ngushtë”, por nëse interesi u vjen në krahun tjetër, as nuk e kanë problem fare të të kthejnë kurrizin, se vlen më shumë paraja sesa fjala e burrit.
E kujt burrë i hyn në punë “fjala e burrit”, më shumë se paratë, me të cilat mendon se me to mund të ketë makinë luksoze, të dashura sa të dojë, si dhe apartament në qendër të Tiranës, në fund të fundit kjo është edhe moda e punë e madhe, se nuk flet më me shokët se i doli i pabesë. “Shqiptari kur e jep fjalën e mban edhe i vdekur të jetë”, kjo shprehje të kujton vetëm legjenda, pasi pas viteve 90’ janë të pakët burrat, ndërsa ka shumë meshkuj.

Shkrimet e fundit nga Klodiana Kotorri